Mga 

Isinaboteng Syokoy 

Sa Gitna Ng De Latang Sirena

19 Tulang Toksik Ni PaulHRoquia

AKO
IKAW
KATATONIKA
SIMBASIMBAHAN
PUSA
MOON MAMON
AYOKO. AYOKO NA. AYOKO NANG MAGMAHAL
ULIRAT
ANWI 200.1
TRAYDOR
ANWI 201.2
ANWI 202.2
[TANGING] NAIS KO
TULAK
TRAYSIKEL
PALENGKE
BRUTAL
TIMANG
SONATA CON DAGANG MAYNILA

 A  K  O

nag-iisa.
namumukod tangi.
may sariling mundo, ayaw paawat
sa ano mang nais ko
maipamukha lamang sa sarili
na itong nilalang na ito
ay
ako.

 I K A W

wala akong
pakialam sa'yo
dahil ikaw
ay hindi ako
at kailanman
di ka magiging
ako, at ako
nungkang maging ikaw
(kahit clone pa kita)!

KATATONIKA

tulala
at
walang
magawa...
maghapo't
magdamag
siyang
di
makangawa
kundanga't
panaho'y
lumipas
na't
lahat
magawa ay
wala
at
tulala

 SIMBASIMBAHAN

sumainyo ang kapayapaan,
sumakanila ang kabanalan
lumuhod ka't manimdim, magdasal
ng walang tingkad
upang kaipala'y sumibol
sa isipan ang
katuturan
ng inilalakong
katotohanan!
mahirap mang arukin, salukin mo nawa
ang hiwaga ng abitong
magara
dahil hatid nito'y
dusa mula pa sa mga
prayleng nagpamana...
magmunimuni ka kaya?
silipin ang kahunghangang nakasilid
sa bawat orasyong
pinangangalandakan
at tuparin ang sumpang
ang langit
ay pag-aari ng simbahang sa
bawa't sandali
ay sa iyo'y
nagtataksil

P U S A

sa kawalan ng mamahali'y

kuting siyang iyong aampunin.

bibitbitin at aamuin sa kakapiranggot

na dilis nang agad kang kilalaning

panginoon.

papangalana't ilalayo sa mga pusakal

nang di mapariwara ang bubot na

kamalayang pusa.

hahagurin, lalaruin, ipagbubunying

parang sanggol

hahanap-hanapin upang pagod mo'y

mapigtal sa mayuming kalambutan

ng balahibo niyang hika ang katapat.

at sa kanyang pagkapusa'y mangingimi

ka, di niya alintana ang

pag-aruga

sapat nang lumaki siya't magising

ka sa lambing niyang gutom

at sa kanyang mata'y pagkain ka!

 MOON MAMON

tuwing kabilugan syempre ng buwan

hayun siya't di magkamayaw at parang sinisilaban

wala namang pumapansin pilit siyang nananalamin

at kahit paano ay may mag-aksayang maninimdim!



moon mamOn!

moon mamOn!



adik siya sa liwanag ng buwan

sabik sa puting silaw nito

walang init, walang laman

kaya naman ang tawag sa kanya

ay

moon mamOn!

moon mamOn!



walang lasa. walang tagik.

walang pag-asa, laging sabik.



moon mamOn!